06.09.2023

Trençevska nga konferenca e OSBE-së: Përfshirja më e madhe e grave në politikë garanton zgjidhjen e shumë sfidave me të cilat ballafaqohen gratë

“Si Qeveri jemi të përkushtuar që të promovojmë barazinë gjinore në të gjitha fushat. Kjo është arsyeja pse një nga hapat e parë që hodhëm në vitin 2017 ishte ratifikimi i Konventës së Stambollit. Që të mund të flasim për avancimin e statusit të gruas në shoqëri, së pari duhet t'i nxjerrim ato nga sfida dhjetëvjeçare që qëndron si barrierë kryesore për suksesin e tyre, e cila është dhuna”, theksoi Trençevska në fjalimin e saj në konferencë për barazinë gjinore dhe përforcimin e rolit të gruas.

Ministrja e Punës dhe Politikës Sociale, Jovanka Trençevska, sot foli në sesionin e tretë të punës “Pjesëmarrja politike e grave/barazia gjinore në jetën politike” që ishte pjesë e konferencës së OSBE-së për barazi gjinore dhe fuqizim të rolit të gruas.

Trençevska në fjalën e saj foli për rregulloret ligjore që garantojnë promovimin e barazisë gjinore, me fokus në Konventën e Stambollit dhe Ligjin për Parandalimin e Dhunës ndaj Grave dhe Vajzave nga viti 2021. “Me Ligjin e ri për Parandalimin e Dhunës ndaj grave dhe vajzave nga viti 2021, detyrojmë institucionet të marrin masat e duhura në rast të çdo akti dhune. Institucionet janë pika kyçe në rrethin që i nxjerr viktimat nga dhuna dhe vazhdojnë punën e tyre të vazhdueshme në mënyrë që secila prej tyre të integrohet pa probleme në shoqëri, të ecë në rrugën e suksesit dhe të kontribuojë në suksesin e një viktime tjetër”, theksoi Trençevska.

Ajo theksoi se puna për këtë çështje dhe për ngritjen e vetëdijes për dhunën tek gratë është jashtëzakonisht e rëndësishme, megjithatë, duke theksuar se asnjë legjislacion nuk do të përshkruajë saktë sfidat e grave nëse gratë nuk përfshihen në bartjen e të njëjtave.

“Për momentin 5 gra janë ministre në poste qendrore në proceset vendimmarrëse dhe 3 janë zëvendësministre. Janë 49 deputete, një numër më i madh drejtoresh – gra që me kontributin e tyre në shoqëri përfaqësojnë forcën, zërin dhe besimin e shumë grave se ëndrrat mund të realizohen, dhe vendimet mund dhe duhet të merren nga gratë. Këto shifra janë inkurajuese në disa fusha, por ende shumë të ulëta në të tjera. Megjithatë, rruga drejt jetës politike për gratë dhe burrat është ende e ndryshme, këtë mund ta shohim në nivel lokal, ku nisin ndryshimet reale”, tha ministrja.

Trençevska e përfundoi fjalën e saj duke theksuar se gruaja në politikë do të thotë siguri dhe premtim se nevojat e çdo gruaje nuk do të lihen në hije, por do të vihen në rend dite në tavolinën e vendimmarrjes.