12.09.2023

Trençevska: Ndërmarrjet sociale do të kontribuojnë në krijimin e vendeve të reja të punës për grupet e cenueshme

Para Qendrës së Ndërmarrjeve Sociale, në Shkup është mbajtur “Panairi i Tretë i Ndërmarrjeve Sociale”. Me pjesëmarrjen e rreth 50 stendave janë promovuar produktet dhe shërbimet e ndërmarrjeve sociale nga vendi, por edhe nga Serbia, Mali i Zi, Kosova dhe Shqipëria.

Ministrja e Punës dhe Politikës Sociale, Jovanka Trençevska theksoi se shkëmbimi i përvojave dhe rrjetëzimi nga mbajtja e ngjarjeve të tilla është dobi e madhe për zhvillimin dhe promovimin e ndërmarrësisë sociale.

“Si Qeveri dhe Ministria e Punës dhe Politikës Sociale i mbështesim fuqishëm këto manifestime promovuese – panaire, ku ideja e realizuar e dikujt mund të jetë nxitje për zgjidhje të reja kreative, pra themelimin dhe funksionimin e ndërmarrjeve të reja sociale. Rëndësia e ndërmarrjeve sociale buron nga roli i tyre domethënës që ato kanë në çdo shoqëri, që është se ato krijojnë mundësi të barabarta dhe mundësojnë një shoqëri të barabartë, kontribuojnë në zhvillimin mjedisor dhe ekonomik, por edhe kontribuojnë në uljen e varfërisë. Ato ndihmojnë rritjen ekonomike, ndikojnë në kohezionin social dhe zhvillimin dhe aplikimin e teknologjive të reja”theksoi Trençevska.

Duke pasur parasysh se Strategjia Kombëtare për Ndërmarrësi Sociale 2021-2027, me plan veprimi dyvjeçar 2021-2023 është miratuar në shtator të vitit 2021 dhe është duke u zbatuar, si dhe është duke u përgatitur edhe Ligji për Ndërmarrjet Sociale, prandaj Qeveria dhe Ministria e Punës dhe Politikës Sociale zbatojnë qartë përcaktimin strategjik për zhvillimin e mëtejshëm dhe marrjen e një pozicioni të përshtatshëm të ndërmarrjeve sociale në kontekstin socio-ekonomik kombëtar.

“Me mbështetjen institucionale për sipërmarrjen sociale, ne i zgjidhim sfidat si në nivel qendror ashtu edhe në atë lokal që kanë të bëjnë me varfërinë, papunësinë dhe çështje të tjera socio-ekonomike që lidhen me integrimin e grupeve të cenuara. Ndërmarrjet sociale do të kontribuojnë në krijimin e vendeve të reja të punës për grupet e rrezikuara. Ligji për Ndërmarrjet Sociale është në fazën përfundimtare dhe besojmë se deri në fund të vitit do të miratohet”theksoi Trençevska.

Ministrja informoi se do të përcaktojë se si organizatat civile, shoqatat e qytetarëve, kooperativat, kompanitë dhe të gjitha subjektet e tjera juridike mund të marrin statusin e ndërmarrjes sociale. Me statusin, këto ndërmarrje që do të punësojnë njerëz nga një kategori të cenuara dhe që riinvestojnë fitimet e tyre për të arritur misionin e tyre social, solidar ose mjedisor, do të mund të marrin përfitime që do t'i lejojnë ata të rrisin biznesin e tyre, të punësojnë më shumë persona dhe të kontribuojë në zgjidhjen e problemeve socio-ekonomike.

Ambasadori i Bashkimit Evropian në Maqedoninë e Veriut, Dejvid Gir, nënvizoi: “Ky manifestim çdo shtator kthehet në një ngjarje tradicionale. Ekonomia sociale ka një rëndësi të madhe në Bashkimin Evropian. Ndërmarrjet sociale janë vërtet kompani të kujdesshme që punësojnë njerëz që pa to do të ishin pa punë, pa fonde dhe pa të ardhme. Falë tyre, ata tani janë pjesë e një komuniteti më të gjerë. Prandaj ne e mbështesim zhvillimin e tyre, shohim përparim të madh, por nuk duhet të ndalemi me kaq…”.

Panairi shënoi fillimin e Forumit Rajonal për Sipërmarrësit Socialë, një konferencë që fokusohet në rëndësinë e zhvillimit të mekanizmave mbështetës dhe kornizave ligjore për të inkurajuar ndërmarrjen sociale si një instrument i fuqishëm për zhvillimin social dhe ekonomik në rajon.