26.04.2023

Trençevska: Ndërtimi, mirëmbajtja dhe menaxhimi i sistemeve të sigurisë dhe shëndetit në vendin e punës duhet të jetë detyrë dhe prioritet i të gjithë aktorëve përkatës në këtë fushë

Me rastin e shënimit të 28 Prillit – Ditës Botërore të Sigurisë dhe shëndetit në punë, sot në Fakultetin e Inxhinierisë Mekanike në Shkup u mbajt manifestimi: “Studiuesit e rinj në funksion të një mjedisi pune të sigurt dhe të shëndetshëm si parim themelor dhe e drejta e punëtorëve për punë të denjë”. Në këtë rast folën ministrja e Punës dhe Politikës Sociale, Jovanka Trençevska, Koordinatori Nacional i Organizatës Ndërkombëtare të Punës (ONP), Emil Kërstanovski dhe kryetarja e Këshillit Nacional për Siguri dhe Shëndet në Punë, Jasmina Çaloska.

Ministrja Trençevska në fillim të fjalës së saj, shprehu kënaqësinë për mundësinë për të dëgjuar prezantimet e hulumtuesve të rinj, magjistrantëve, doktorantëve dhe studentëve, pjesëmarrja e të cilëve në këtë fushë të rëndësishme të punës jep një kontribut të rëndësishëm.

“Kjo është një mundësi vërtet shumë e mirë, në këtë event të mbështetur nga Këshilli për sigurinë dhe Shëndetin në punë, për të qenë në gjendje të njihemi më drejtpërdrejt me disa nga temat dhe fushat me të cilat po punojnë studiuesit e rinj në fushën e sigurisë në punë dhe mjekësisë së punës pranë fakulteteve në të gjithë vendin. Dhe si këto kërkime, studime dhe punime do të mund të gjejnë më tej zbatimin e tyre real në zhvillimin e sigurisë dhe shëndetit në punë në kompanitë tona. Është e një rëndësie të veçantë që këta të rinj njohuritë e fituara t'ua përcjellin kompanive ku do të punojnë ose institucioneve arsimore, duke edukuar gjeneratat e reja të profesionistëve dhe ekspertëve të sigurisë dhe shëndetit në punën", theksoi Trençevska.

Ministrja theksoi se shënimi i sivjetshëm i Ditës Botërore të SSHP-së është specifik për një tjetër veçori. Dhe ky është fakti që këtë vit ne e festojmë ditën në kushte ku e drejta për një mjedis të sigurt të shëndetshëm pune, nga Organizata Ndërkombëtare e Punës, është njohur dhe përfshirë si parim themelor dhe e drejtë për punë, duke i dhënë në këtë mënyrë kësaj të drejte të njëjtën rëndësi dhe kuptim si katër parimet dhe të drejtat e tjera të punëtorëve  të cilat janë thelbësore për arritjen e asaj që ne të gjithë e quajmë "punë e denjë".

E drejta për një mjedis pune të sigurt dhe të shëndetshëm për punëtorët bëhet po aq e rëndësishme me parimet dhe të drejtat e tjera në punë, si: e drejta për lirinë e organizimit dhe marrëveshjet kolektive, eliminimi i të gjitha formave të punës së detyruar, çrrënjosja efektive e punës së fëmijëve. dhe eliminimi i diskriminimit në punësim dhe në punë.

“Me këtë, edhe një herë dhe në nivel ndërkombëtar, të mbështetur nga organizata që vendos dhe promovon standardet ndërkombëtare të punës, është theksuar rëndësia dhe roli thelbësor në botën moderne të punës, përkatësisht për sigurinë dhe shëndetin në vendin e punës dhe zhvillimin e kulturës së parandalimit i cili do të kontribuojë që proceset e punës dhe kushtet në të cilat punojnë punëtorët tanë të mos jenë të rrezikshme apo të dëmshme për shëndetin apo sigurinë e tyre”, theksoi Trençevska.

Ajo theksoi se ndërtimi, mirëmbajtja dhe menaxhimi i sistemeve të sigurisë dhe shëndetit në vendin e punës duhet të jetë detyrë dhe prioritet i të gjithë aktorëve relevantë në fushën e SSHP. Dhe të gjithë duhet të punojnë në mënyrë aktive së bashku, secili në fushën e vet dhe brenda kompetencave dhe aftësive të tyre, për të siguruar vende pune edhe më të sigurta për të gjithë puntorët.