26.07.2021

Ministrja Shahpaska: Filloi me punë Qendra e parë për mbështetjen e familjeve kujdestare në vendin tonë, reforma sociale vazhdon 

Qendra e parë për mbështetjen e familjeve kujdestare në vendin tonë ka filluar punën. Qendra është e vendosur në ambientet e ish-shtëpisë për fëmijë pa kujdes prindëror “11 Tetori” në qendër të qytetit. Kjo është arritur si rezultat i përpjekjeve të Ministrisë së Punës dhe Politikës Sociale, e cila së bashku me institucionet sociale dhe partnerët ndërkombëtarë nga UNICEF synojnë të forcojnë dhe përmirësojnë kujdesin ndaj fëmijëve të cilët, për arsye të ndryshme, nuk mund të jetojnë me familjet e tyre.
Ministrja e Punës dhe Politikës Sociale, Jagoda Shahpaska, shprehu kënaqësi të madhe me rastin e hapjes së kësaj Qendre, e cila, siç theksoi ajo, është edhe pasqyrë se si shoqëria kujdeset për më të vegjlit, fëmijët, me theks të veçantë për fëmijët pa prindër dhe kujdes prindëror.
“Suksesi i një shoqërie është i matshëm përmes kujdesit për qytetarët, veçanërisht kujdesit për fëmijët. Përfitimi i hapjes së Qendrës për mbështetjen e familjeve kujdestare është jashtëzakonisht i madh, i cili synon të mbështesë, ndihmojë dhe t’i orientojë familjet kujdestare për të siguruar pikërisht atë kujdes që i nevojitet një fëmije që është i vendosur tek ato. Ekipi i ekspertëve të Qendrës do të sigurojë mbështetje profesionale, trajnim, këshilla dhe udhëzime për familjet kujdestare për të realizuar së bashku ‘interesin më të mirë të fëmijës’, siç parashikohet dhe Konventa për të Drejtat e Fëmijëve. "Me hapjen e Qendrës së sotme për mbështetjen e familjeve kujdestare në Shkup, por edhe me hapjen e qendrës së njëjtë në Manastir këtë të mërkurë, ne dërgojmë një mesazh se familjet kujdestare janë një pjesë jashtëzakonisht e rëndësishme e sistemit të mbrojtjes sociale”, tha ministrja Shahpaska.
Ajo vuri në dukje rolin jo më pak të rëndësishëm të Qendrës për mbështetjen e familjeve kujdestare, duke promovuar përkujdesjen familjare, respektivisht duke motivuar sa më shumë qytetarë të interesuar të bëhen fëmijë strehues të fëmijëve.
“Numri i sotëm i familjeve kujdestare në vend është rreth 300 të cilët kujdesen për rreth 500 fëmijë, por ne presim që këto numra të vazhdojnë të rriten, në mënyrë që çdo fëmijë në nevojë për strehim të mund të kujdeset në një mjedis familjar”, tha ministrja.
Përfaqësuesja e UNICEF-it në vend, Patricia di Xhovani, theksoi se asgjë nuk mund të zëvendësojë dashurinë dhe mbështetjen e dhënë nga mjedisi familjar.
“Fëmija, kur mbetet pa kujdes familjar, fillon të vuajë, gjë që mund të ketë pasoja të dëmshme për rritjen dhe zhvillimin e tij. Kjo është arsyeja pse qëndrimi në një familje kujdestare, edhe për një periudhë të shkurtër kohe, është mënyra më e mirë për të siguruar që çdo fëmijë të marrë atë që secili prej nesh do të presë për fëmijët e tij - kujdes të duhur, dashuri dhe përkushtim”, tha Di Giovani.
Drejtoresha e Institucionit Publik “11 Tetori”, Sonja Stamevska, informoi se pesëmbëdhjetë profesionistët e sapo punësuar në Qendrën për mbështetjen e familjeve kujdestare në Shkup do të punojnë me më shumë se 180 familje kujdestare të cilat kujdesen për rreth 390 fëmijë nga Shkupi, Kumanova, Tetova, Velesi dhe disa qytete të tjera në vend.
Përmirësimi i sistemit të kujdesit, duke përfshirë hapjen e Qendrës së re, Ministria e Punës dhe Politikë Sociale i zbatoi në partneritet me UNICEF-in dhe me ndihmë të pjesshme financiare nga Ambasada Britanike në vend.

Gjatë kësaj jave pritet të fillojë me punë edhe Qendra e dytë për mbështetjen e familjeve kujdestare në Manastir.
Me themelimin e Qendrës për mbështetjen e familjeve kujdestare vazhdon transformimi i Institucionit Publik për Fëmijët “11 Tetori”, përmes të cilit në vitin 2018 fëmijët e akomoduar në këtë institucion, u zhvendosën në shtëpi me grupe të vogla, në komunitet.