25.02.2022

Trençevska: Nuk do të ndalemi derisa të vendosim një ekuilibër të plotë në barazinë gjinore

Ministrja e Punës dhe Politikës Sociale sot u takua me përfaqësueset e UN Women - Shkup. Në takim u diskutua për format e ndryshme të dhunës ndaj grave, bashkëpunimin dhe promovimin e politikave dhe buxhetimit të përgjegjshëm gjinor, si dhe Ligjin e Ri për Barazinë Gjinore dhe themelimin e Qendrës së Parë Burimore për krijimin e politikave.

Ministrja Trençevska theksoi se Republika e Maqedonisë së Veriut ka ndërmarrë dhe do të vazhdojë të ndërmarrë hapa për mbrojtjen e barazisë ndërmjet burrave dhe grave. Në këtë drejtim, tha Trençevska, është edhe miratimi i Ligjit të ri për Barazi Gjinore.

“Ne nuk do të ndalemi derisa të arrijmë ekuilibrin e plotë në barazinë gjinore. Do të vazhdojmë të prezantojmë mekanizma për promovimin dhe forcimin e barazisë gjinore. Me Ligjin e ri për Barazi Gjinore do të vendosim masa konkrete për arritjen e bilancit gjinor në të gjitha institucionet publike duke marrë masa ligjore për të mundësuar pjesëmarrjen e barabartë të grave dhe burrave në jetën publike dhe vendimmarrje. Vetëm me barazi të vërtetë midis burrave dhe grave do të kemi një shoqëri të drejtë dhe demokratike të bazuar në sundimin e ligjit, tha Trençevska”.

Shefja e zyrës së UN Women, Vesna Ivanoviq - Kastard dhe koordinatorja e programit të projektit për buxhetim me përgjegjësi gjinore, Ivona Paunoviç - Biseac, në takim promovuan shënimin e datave të rëndësishme që kanë të bëjnë me barazinë gjinore. Në prag të Ditës Ndërkombëtare të Gruas – 8 Marsit, thanë se me fushatën që do të zgjasë 10 ditë, do të kundërshtojnë stereotipet që kufizojnë gratë dhe vajzat në barazinë e tyre.

Bashkëbiseduesit konstatuan se Republika e Maqedonisë së Veriut ka bërë përparim të madh në barazinë gjinore, por se roli i gruas në shoqëri duhet të forcohet në mënyrë aktive.