28.06.2022

Trençevska: Përfshirja dhe respektimi i të drejtave të personave me aftësi të kufizuara është një nga prioritetet tona kryesore

Ministrja e Punës dhe Politikës Sociale, Jovanka Trençevska, sot mbajti fjalim në Punëtorinë nacionale për përgatitjen e “Strategjisë nacionale për të drejtat e personave me aftësi të kufizuara” ku morën pjesë kryeministri Dimitar Kovaçevski, zëvendësambasadori i Republikës Federale të Gjermanisë Oto Graf dhe drejtori i Zyrës së GIZ në Maqedoninë e Veriut, David Oberhauber.

Punëtoria u organizua nga Qeveria e Republikës së Maqedonisë së Veriut, Ministria e Punës dhe Politikës Sociale dhe Shoqata Gjermane për Bashkëpunim Ndërkombëtar - GIZ së bashku me ekipin e Agjencive të Kombeve të Bashkuara në vend. Qëllimi i seminarit ishte që të gjithë të interesuarit të shihnin sfidat përmes diskutimit të përbashkët dhe të gjenin zgjidhje të përbashkëta që do të pasqyrohen në Strategjinë Kombëtare për të Drejtat e Personave me Aftësi të Kufizuara.

Trençevska e nisi deklaratën me moton e Konventës për të drejtat e personave me aftësi të kufizuara “Asgjë për ne, pa ne”, e cila theksoi gjithëpërfshirjen e procesit të formimit të Strategjisë Nacionale.

“Politikat publike do të krijohen dhe zbatohen me pjesëmarrjen aktive të personave me aftësi të kufizuara. Përgatitja e Strategjisë së re Kombëtare do të jetë në përputhje me detyrimet dhe parimet e ndërmarra nga Konventa për të Drejtat e Personave me Aftësi të Kufizuara dhe plotësuese me Strategjinë Evropiane për të Drejtat e Personave me Aftësi të Kufizuara, bazuar në të dhënat dhe analizat e bëra nga gjendja momentale me respektimin dhe realizimin e të drejtave të njeriut me aftësi të kufizuara”, tha Trençevska.

Ajo theksoi se atmosfera pozitive krijon kushte për zhvillimin e një strategjie gjithëpërfshirëse dhe realiste që do të jetë e qëndrueshme, e zbatueshme dhe që do të përfshijë pushtetin qendror dhe lokal, organizatat kombëtare të aftësisë së kufizuar, organizatat e shoqërisë civile, personat me aftësi të kufizuara, organizatat e OKB-së.

“Ajo që është shumë e rëndësishme është që ne të ndryshojmë perceptimin e aftësisë së kufizuar, të braktisim modelin e vjetër mjekësor të shikimit të aftësisë së kufizuar, domethënë ta zëvendësojmë atë me vizionin jo mjekësor që inkurajon pikat e forta dhe aftësitë e fëmijëve dhe personave me aftësi të kufizuara, siguron mbështetjen e nevojshme që duhet ta fitojnë për të gëzuar mundësi të barabarta për të zhvilluar potencialin e tyre", tha ministrja.

Trençevska iu referua edhe modernizimit të politikave që mundësojnë punësimin e personave me aftësi të kufizuara, veçanërisht punësimin në tregun e hapur të punës ku zgjidhjet e reja të propozuara paraqesin rehabilitimin profesional dhe aftësimin për punë në mënyrë që personat me aftësi të kufizuara të bëhen konkurrentë në treg dhe në këtë mënyrë të punësohen, por edhe të ruajnë punësimin e tyre.

Kryeministri i Republikës së Maqedonisë së Veriut, Dimitar Kovaçevski, në fjalimin e tij tha se procesi i përgatitjes së Strategjisë nacionale për të drejtat e personave me aftësi të kufizuar, ashtu si edhe më parë, mbetet maksimalisht gjithëpërfshirës, në të cilin fjalën kryesore u drejtohet drejtpërdrejt të prekurve.

“Kjo punëtori është pjesë e arritjes së prioriteteve tona për mbështetjen e personave me aftësi të kufizuara. Ju siguroj se po i lëvizim gjërat në drejtimin e duhur dhe se si politikëbërës përgjegjës do të vazhdojmë të bëjmë gjithçka për personat me aftësi të kufizuara dhe jemi gjithmonë me ta”, shtoi Kovaçevski.

Në fund, folësit uruan punë të suksesshme, të përkushtuar dhe të palodhur, për të përgatitur synime të matshme dhe të arritshme që do të përfitojnë personat me aftësi të kufizuara.