03.03.2022
Trençevska: Me hapjen e Qendrës Burimore për Buxhetim të Përgjegjshëm Gjinor konfirmojmë se jemi lider në rajon në barazi gjinore
“Buxhetet e përgjegjshme gjinore janë kyçe për krijimin e mundësive të barabarta për gratë dhe burrat. E vetmja mënyrë për të treguar se përkushtimi ynë ndaj barazisë gjinore është real, jo deklarativ, është që buxhetet të bëhen të përgjegjshme gjinore", tha ministrja e Punës dhe Politikës Sociale, Jovanka Trençevska në hapjen e qendrës së parë burimore të përgjegjshme gjinore për politikëbërje dhe buxhetim në vend dhe rajon.
Qendra Burimore u hap nga Ministria e Punës dhe Politikës Sociale në bashkëpunim me UN Women, në kuadër të projektit "Promovimi i politikave dhe buxheteve të përgjegjshme gjinore: drejt qeverisjes transparente, gjithëpërfshirëse dhe llogaridhënëse në Republikën e Maqedonisë së Veriut", me mbështetje financiare nga Agjencia Zvicerane për Zhvillim dhe Bashkëpunim (SDC) dhe Agjencia Suedeze për Bashkëpunim dhe Zhvillim Ndërkombëtar - AIDS.
Qëllimi i krijimit të tij është të ofrojë trajnime për përmirësimin e kapaciteteve të nëpunësve civilë në fushën e barazisë gjinore dhe buxhetimit të përgjegjshëm gjinor. Ai do të jetë një qendër njohurish dhe do të dokumentojë kërkime, analiza dhe burime të tjera që lidhen me barazinë gjinore.
Ministrja Trençevska informoi se Ministria është duke punuar në përgatitjen e Ligjit të ri për barazi gjinore, i cili do të kontribuojë në tejkalimin e mangësive ekzistuese, duke siguruar barazi dhe eliminimin e stereotipeve.
Kjo zgjidhje ligjore parasheh themelimin e Sekretariatit për Barazi Gjinore, si organi më i lartë, i cili do të koordinojë dhe monitorojë punën e institucioneve dhe të vetëqeverisjes lokale në zbatimin e ligjit. Gjithashtu, parashikohet krijimi i Qendrës Burimore, si pjesë e planit dhe programit të punës së Ministrisë, në përputhje me Programin e Punës së Qeverisë së RMV-së.
Ambasadorja e Zvicrës në Republikën e Maqedonisë së Veriut, N. E. Veronik Ullman Marti theksoi se krijimi i Qendrës Burimore është rezultat i një procesi të gjatë të nisur 10 vite më parë, kur në fakt janë fillimet e buxhetimit të përgjegjshëm gjinor në vend.
"Maqedonia e Veriut është një pionier në krijimin e buxhetit të përgjegjshëm gjinor dhe do të jetë në gjendje të ndërtohet mbi përvojën praktike të fituar tashmë," tha ambasadorja zvicerane.
Ajo përshëndeti përkushtimin dhe rolin e jashtëzakonshëm drejtues të Ministrisë së Punës dhe Politikës Sociale dhe Sektorit për Mundësi të Barabarta pranë Ministrisë, në fushën e zbatimit të politikave gjinore në vend.
Ambasadorja suedeze H.E. Kristin Forsgren Bengson theksoi se barazia gjinore është një qëllim themelor i politikës së jashtme suedeze dhe duhet të jetë pjesë përbërëse e çdo shoqërie.
“Përfshirja e aspekteve gjinore në politikat kryesore nënkupton aplikimin e perspektivës gjinore në të gjitha aktivitetet dhe shërbimet tona të përditshme për qytetarët. Suedia është krenare që mbështet themelimin dhe funksionimin e Qendrës Burimore të Politikave të Përgjegjshme Gjinore. Mezi presim të shohim se si kjo do të përdoret për të ndërtuar kapacitetin e administratës për të aplikuar perspektivën gjinore në punën e tyre në të mirë të të gjithë qytetarëve të Maqedonisë së Veriut”, tha ambasadori suedez.
Koordinatorja e Përhershme e Kombeve të Bashkuara në Maqedoninë e Veriut, Rosana Duxhiak, iu referua mbështetjes së agjencive të OKB-së për rritjen e kapaciteteve institucionale dhe forcimin e mekanizmave kombëtarë për barazi gjinore në vend. Ajo gjithashtu vuri në dukje përfshirjen e agjencive të OKB-së në krijimin e dokumenteve të rëndësishme si Strategjia Kombëtare 2021-2026 dhe Ligji i ri për Barazinë Gjinore që po hartohet.
"Vetëm së bashku mund të marrim rezultatet që duam të shohim dhe të krijojmë mjedisin që të gjithë kemi nevojë," tha Duxhiak.
“Qendra burimore, e para në rajon, do t'u mundësojë qeverive dhe partnerëve të ndajnë njohuri të reja, të promovojnë mësimin dhe të shkëmbejnë praktika të mira sesi buxhetet dhe politikat fiskale plotësojnë në mënyrë të barabartë nevojat e grave dhe burrave”, tha Blerta Cela, zëvendës drejtoresha rajonale e UN Women për Evropën dhe Azinë Qendrore.
Barazia gjinore dhe mundësitë e barabarta për gratë dhe burrat është një nga prioritetet e Qeverisë së Republikës së Maqedonisë së Veriut. Në këtë drejtim janë të gjitha aktivitetet që synojnë përmirësimin e legjislacionit, politikave dhe dokumenteve strategjike në lidhje me këtë fushë.