24.04.2025

Sabriu: Barazia gjinore nuk është thjesht ideal, është domosdoshmëri, sepse të gjithë njerëzit meritojnë një shans të barabartë

Sekretari shtetëror i Ministrisë së Politikës Sociale, Demografisë dhe Rinisë, Fatmir Sabriu, mori pjesë në ngjarjen përmbyllëse të Projektit “Së bashku për barazi gjinore: Ndërtimi i mbështetjes për politika gjinore gjithëpërfshirëse”, i cili zbatohet nga HERA me mbështetjen e Ambasadës Britanike, Shkup.

Aktiviteti u organizua nën moton - Unë dhe ti në një zë: Barazia gjinore - misioni ynë i përbashkët.

Në fjalën e tij para të pranishmëve, Sekretari Shtetëror Sabriu shprehu mbështetjen për projekte si ky që kanë për qëllim ngritjen e vetëdijes për rëndësinë e barazisë gjinore, e cila është e rëndësishme për çdo komunitet. Njëkohësisht, ai konfirmoi përpjekjet e ministrisë për krijimin e politikave gjinore, zbatimi i të cilave, siç tha ai, varet nga progresi i një shoqërie.

“Barazia gjinore nuk është thjesht një ideal - është një domosdoshmëri. Ne jetojmë në një kohë kur më shumë se kurrë flitet për drejtësi, liri dhe të drejta të njeriut. Por ato fjalë mbeten boshe nëse nuk i përfshijmë në politika konkrete, reale - dhe nëse ato politika nuk i përfshijnë të gjitha. Po flasim për politika gjinore gjithëpërfshirëse – politika që nuk shikohen vetëm nga perspektiva mashkullore apo femërore, por nga perspektiva njerëzore”, theksoi Sabriu.

Ai theksoi se të gjithë njerëzit meritojnë mundësi të barabarta – pavarësisht nëse janë gra apo burra, pavarësisht nga statusi apo identiteti i tyre gjinor. Ai shtoi se vetëm duke pranuar diversitetin dhe duke ofruar mundësi për të gjithë, bazuar në kritere si profesionalizmi, kompetenca, përgjegjësia, zelli e të ngjashme, ne të gjithë së bashku mund të bëjmë shumë më tepër për përparimin e vendit tonë, e rrjedhimisht edhe për veten tonë.

Sabriu ka trajtuar edhe lidhjen ndërmjet barazisë gjinore dhe zhvillimit ekonomik. 

“Kur gratë dhe grupet e margjinalizuara kanë akses të barabartë në punë, burime dhe arsimim, kjo kontribuon në produktivitet dhe inovacion më të madh. Politikat që përfshijnë gjininë nënkuptojnë që zëri i të gjithëve të dëgjohet. Do të krijojmë një sistem që njeh diversitetin dhe nuk e përdor atë si justifikim për përjashtim, por si arsye për një të ardhme më të mirë, më të drejtë dhe më të qëndrueshme”, theksoi Sabriu.

Ai ka trajtuar edhe diskriminimin, që siç theksoi ai e ha shoqërinë! Dhe kështu një konfirmim tjetër se ne kemi nevojë për politika gjithëpërfshirëse gjinore.

“Kur flasim për diskriminim duhet theksuar - ai nuk zgjidhet vetvetiu. Zgjidhet me guxim, vetëdije dhe vullnet politik. Prandaj, nëse synojmë përparim, nuk mund të presim nëse një pjesë e konsiderueshme e popullsisë lihet në margjina”, theksoi Sabriu.