18.08.2021

Шахпаска: 95% од вработените во ЦСР Велес се вакцинирани, нивната работа на терен продолжува со цел да одговорат на потребите на граѓаните

Министерката за труд и социјална политика, Јагода Шахпаска денеска го посети Центарот за социјална работа (ЦСР) Велес. На средбата со социјалните работници министерката се информираше за тоа како се одвива спрведувањето на социјалната реформа донесена во 2019 година. Новиот начин на работа во Центрите за социјална работа претставува работа со семејството, коешто е во ризик, во целина со сите парични права, но и со сите услуги што треба да ги завршат социјалните работници.

- Со вработените разговаравме околу тоа како стручните работници излегуваат на терен и покрај пандемијата, со цел да одговорат на потребите на граѓаните. Исто така разговаравме и за новиот пристап на работа која значи не само пасивно примање на паричните права туку и работа со семејството со цел тоа да се извлече од ризик, рече Шахпаска.

Министерката Шахпаска беше информирана дека 95% од вработените во ЦСР Велес се вакцинирани бидејќи ја имаат предвид важноста за нивната работа во новиот бран на пандемијата со Ковид19.

Министерката потенцираше дека суштината на социјалната реформа не е регрутирање на поголем број на корисници, туку нивно вадење од сиромаштија и преку процесот на активација нивно оспособуање за работа преку Центрите за социјална работа и Агенцијата за вработување.

Обврската е голема рече министерката бидејќи центрите за социјана работа се првата станица на која најранливите групи на граѓани се обраќаат за помош. Уште поголема е обврската на ЦСР Велес бидејќи во неговата рамка се и Дневниот центар за деца и лица со телесна или ментална попреченост, Дневен центар и клуб за стари и возрасни лица во општините Чашка и Богомила, Центар за жртви од семејно насилство т.е. Шелтер центар. Во рамките на Центарот функционира и услугата за персонална асистенција на лица со попреченост и Народна кујна.