30.04.2025

Сабриу: Секое дете со аутизам е различно, но секое заслужува исто-љубов, поддршка и место во општеството

Државниот секретар на министерството за социјална политика, демографија и млади, Фатмир Сабриу го посети Здружението на родители на деца со аутизам „Blue Puzzle“ (Блу Пазл) -давател на услугата дневен престој за лица со попреченост.

Како дел од серијата настани организирани по повод месец Април- месецот на подигање на свеста за аутизмот Сабриу се обрати пред присутните изразувајќи голема чест и задоволство за денешниот настан.

„Овој месец не е само симболика. Тој е потсетник за важноста од разбирање, прифаќање и поддршка на лицата со аутизам и нивните семејства. Денес уште еднаш сакам да потенцирам - аутизмот не е болест. Тој е спектар, различност, начин на перцепција на светот што не мора да се промени, туку да се прифати и разбере. Лицата со аутизам се уникатни – со свои таленти, интереси, способности и начини на комуникација. Нашата улога како општество е да создадеме простор каде тие ќе се чувствуваат безбедно, слушнато и вреднувано. Затоа денес, излегуваме со  јасна порака: прифаќањето почнува со разбирање. Да ги урнеме предрасудите. Да го замениме стравот од непознатото со желба за учење и соработка. Да овозможиме инклузивни училишта во секоја заедница и  инклузивни институции во секоја општина. Да не заборавиме – различноста не нè дели, таа нè збогатува,“ истакна Сабриу.

Користејќи ја оваа прилика тој изрази благодарност до Здружението на родители на деца со аутизам „Blue Puzzle“(Блу Пазл) кои направија огромен чекор напред со воспоставувањето на дневниот центар за децата со аутистичен спектар на нарушувања. 

„Министерството за социјална политика, демографија и млади е ваш партнер во оваа важна мисија и продолжува со поддршката која ја дава.  Заедно можеме да направиме разлика. Да изградиме свет каде различноста се слави, а не се крие. Секое дете со аутизам е различно, но секое заслужува исто: љубов, поддршка и место во општеството. Да бидеме гласот што охрабрува, раката што поддржува, срцето што разбира,“ порача Сабриу.