По повод Денот на згрижувачките семејства, заменик министерот за социјална политика, демографија и млади, Ѓоко Велковски, денес присуствуваше и се обрати на настанот организиран од ЈУ „11 Октомври“ – Скопје, кој се одржа во ЗОО Скопје.
Во своето обраќање, заменик министерот Велковски ја истакна важноста на згрижувачките семејства во обезбедувањето сигурна, топла и поддржувачка семејна средина за децата и лицата на кои им е потребна дополнителна грижа
„Да се биде згрижувач не е само обврска, туку повик да се отвори срцето и да се создаде чувство на припадност и сигурност за некого кому тоа му е најпотребно. Вашата улога во општеството е од непроценливо значење и благодарение на вашата посветеност, многу деца добиваат можност да растат во средина исполнета со љубов, грижа и внимание“, истакна Велковски.
Тој упати и повик до сите хумани граѓани кои имаат желба и можност да помогнат, да размислат за вклучување во системот на згрижување и да им дадат поддршка на децата кои се соочуваат со животни предизвици.
Заменик министерот нагласи дека Министерството за социјална политика, демографија и млади останува цврсто посветено на унапредување на системот на згрижување, обезбедување поголема поддршка за згрижувачките семејства и создавање услови секое дете да расте во безбедна и поттикнувачка средина.
На крајот од своето обраќање, Велковски упати искрена благодарност до сите згрижувачки семејства за нивната пожртвуваност, трпение и несебична љубов, истакнувајќи дека тие претставуваат пример за хуманост и инспирација за целото општество.
