Министерот за социјална политика, демографија и млади, Ѓоко Велковски, заедно со градоначалникот на Општина Илинден, Александар Ѓорѓиевски, и пратеничката Драгана Бојковска, денеска ги отворија новите занимални во ЈОУДГ „Гоце Делчев“ во Општина Илинден, кои од утре ќе започнат со прием на деца.
Со новите занимални, чиј капацитет е за околу 50 деца, се прошируваат постојните капацитети за згрижување и воспитување на најмладите, а воедно се создаваат подобри услови за нивниот престој и развој.
Ова е уште една инвестиција во унапредувањето на условите во детската градинка, по отворањето на новата централна кујна пред само неколку месеци. Инвестицијата во новите занимални е целосно реализирана од Општина Илинден.
Во рамки на активностите, уреден и опремен е и повеќенаменски простор наменет за стручниот, воспитно-згрижувачкиот кадар и останатите вработени во градинката. Просторот ќе овозможи подобри услови за подготовка и реализација на дневните воспитно-образовни активности, работа на проекти, како и подобрување на благосостојбата на вработените.
При посетата беше отворена и подрачната канцеларија на Центарот за социјална работа Гази Баба, лоцирана во просториите на Општина Илинден. Канцеларијата ќе им овозможи на жителите на општината полесен пристап до услугите и поддршката од областа на социјалната заштита, без потреба за патување до седиштето на Центарот.
Министерството за социјална политика, демографија и млади продолжува со активности насочени кон унапредување на системот за социјална заштита, проширување на капацитетите за згрижување деца и создавање поквалитетни и подостапни услуги за граѓаните.
