Меѓуресорската работна група која изминатиот период работеше на новата Национална стратегија за демографска отпорност, одржа работна средба во проширен состав вклучувајќи ги и лицата задолжени за односи со јавност од клучните министерства: социјална политика, демографија и млади, образование и наука, здравство, економија, локална самоуправа, спорт, транспорт и врски и финансии. Комуникацијата има централна улога во ефективното спроведување на Стратегијата и оттука во неа има издвоено посебно поглавје – Комуникација и јавна ангажираност за демографска отпорност.
На работната средба покрај претставници на министерствата и УНФПА, присуствуваше и Националниот координатор за демографија Влатко Ѓорчев и меѓународниот експерт Хозе Мигуел.
Стратегијата за демографска отпорност се стреми кон демографска ревитализација преку интегрирање на социјални, културни и економски инвестиции, со цел подобрување на квалитетот на живот, зајакнување на семејствата и младите, зајакнување на локалните заедници и поттикнување инклузивен просперитет во сите региони. Затоа, Стратегијата за демографска отпорност е камен темелник на долгорочната визија на Северна Македонија за одржлив и инклузивен развој, надополнувајќи ја Националната развојна стратегија и служејќи како патоказ за интегрирање на демографските приоритети во националното планирање.
На средбата се разви продуктивна дискусија, а забелешките по истата ќе бидат земени во предвид. Истата ќе се развива со понатамошни консултации и со граѓанскиот сектор, коморите и академската заедница, со цел креирање на Стратегија која ќе одговори на предизвиците на нашата држава вклучувајќи ја и дијаспората.
