Претставници од Министерството за социјална политика, демографија и млади учествуваа на третиот состанок на претставниците на Национални координативни тела за имплементација на Истанбулската Конвенција во Калкара, Малта.
Целта на состанокот е претставување на системот за справување со родово базираното насилство врз жените и семејното насилство, предизвиците со кои се соочуваат земјите при имплементација на Конвенцијата и добрите пракси на земјите членки на Европската Унија и земјите кандидатки.
Во своето обраќање пред присутните, раководителката на Секторот за еднакви можности Светлана Цветковска, го потенцираше напредокот на нашата држава во спречувањето и борбата против насилство врз жените и семејното насилство и добрите пракси кои што ги имаме спроведено како држава.
На панелот беа истакнати и добрите пракси во реализирањето на обуки за професионалци и тоа: почетни обука за спречување и заштита од насилство врз жени и семејно насилство за социјални работници, полициски службеници, здравствени работници, судии и јавни обвинители, обуките на мулти секторските тимови за постапување во случаи на родово базирано насилство. Воедно беа презентирани и активностите за подигнување на јавната свест за препознавање и пријавување на насилството врз жените и семејното насилство, како и кампањата „Има помош за живот без насилство“.
Приоритет за Владата на Република Северна Македонија и Министерството за социјална политика, демографија и млади е брза и ефикасна постапка за заштита на жртвите и обезбедување на превенција во насока на намалување на насилството.
