Државниот секретар во Министерството за социјална политика, демографија и млади, Фатмир Сабриу, денес присуствуваше и се обрати на свеченото отворање на Скопскиот интернационален модел на Обединетите нации – СИМУН 2026, меѓународна младинска конференција која од 15 до 17 јуни се одржува во Скопје во организација на Македонската асоцијација на Обединетите нации.
Конференцијата обедини повеќе од 70 млади учесници од Северна Македонија и регионот, кои во текот на тридневната програма преку симулации на работата на телата на Обединетите нации ќе дебатираат за актуелни глобални предизвици поврзани со мирот и безбедноста, развојот и менталното здравје на младите.
Во своето обраќање, државниот секретар Сабриу истакна дека младите луѓе не смеат да бидат гледани како пасивни набљудувачи на општествените процеси, туку како активни носители на промени и партнери во креирањето на иднината.
„Долго време, на младинските прашања се гледаше како на споредна работа — како на некоја ситна фуснота во поголемите министерства. Но, оваа земја избра поинаков пат. Со основањето на посебното Министерство за социјална политика, демографија и млади, оваа држава испрати моќна, недвосмислена порака до светот. Таа јасно стави до знаење дека младите луѓе не се само статистичка демографија со која треба да се управува. Вие сте сила на која мора да се смета. Вие сте приоритет.Не можеме да изградиме одржлива економија, праведно општество и успешна демографска политика доколку младите немаат свое место таму каде што се носат одлуките“, порача Сабриу.
Тој нагласи дека СИМУН претставува пример за тоа како младите преку дијалог, соработка и размена на идеи можат да придонесат кон градење на подобро и поинклузивно општество.
„Не дозволувајте никој да го минимизира вашиот потенцијал поради вашите години. Вашиот идеализам не е слабост – тој е вашето најголемо богатство. Зборувајте со храброст, слушајте со понизност и верувајте дека вашите идеи и вашата акција имаат моќ да го менуваат светот“, истакна државниот секретар.
Министерството за социјална политика, демографија и млади останува посветено на создавање политики кои ги вклучуваат младите како рамноправни партнери, преку поддршка на младинското учество, развојот на лидерските капацитети и поттикнувањето на активното граѓанство.
СИМУН 2026 претставува значајна платформа за младите од земјата и регионот да ги развиваат своите знаења за дипломатијата, меѓународните односи и глобалните политики, поттикнувајќи ги вредностите на соработка, меѓусебно разбирање и мир.
