Ministri i Politikës Sociale, Demografisë dhe të Rinjve, Gjoko Vellkovski, së bashku me kryetarin e Komunës së Koçanit, Vlladko Grozdanov, dhe Sekretarin e Përgjithshëm të Kryqit të Kuq të RMV-së, Sait Saiti, përuruan sot Qendrën Ditore për Personat me Aftësi të Kufizuara në Koçan.
Qendra ditore u themelua përmes partneritetit ndërmjet Organizatës Komunale të Kryqit të Kuq në Koçan dhe komunave Koçan, Çeshinovë-Obleshevë e Zërnovci, me mbështetjen e Thirrjes së Tretë Publike për Zhvillimin e Shërbimeve Sociale në kuadër të Projektit për Përmirësimin e Shërbimeve Sociale.
"Synimi ynë është që shërbimet sociale të jenë të disponueshme aty ku qytetarët kanë më së shumti nevojë për to. Hapja e kësaj Qendre Ditore është një hap tjetër konkret drejt krijimit të një sistemi që garanton mbështetje, mundësi të barabarta dhe përfshirje më të madhe të personave me aftësi të kufizuara në komunitet" theksoi ministri Vellkovski.
Në përputhje me licencën e lëshuar, Qendra ka kapacitetin për t'u shërbyer 12 përfituesve në muaj. Shërbimi u dedikohet individëve mbi moshën 26 vjeç me aftësi të kufizuara të rënda fizike, intelektuale ose të kombinuara, të cilët kanë nevojë për mbështetje në funksionimin e përditshëm, socializim dhe zhvillimin personal.
Qendra ofron aktivitete profesionale-pune, edukative, rekreative dhe sociale, si dhe aktivitete për rritjen dhe zhvillimin personal. Aktivitetet janë të përshtatura sipas nevojave, interesave, potencialit dhe aftësive funksionale të përfituesve.
Përmes këtij shërbimi krijohen kushte për zhvillimin dhe ruajtjen e aftësive ekzistuese, rritjen e pavarësisë dhe të vetëbesimit, si dhe nxitjen e ndërveprimit social dhe të pjesëmarrjes aktive në komunitet.
Ministria e Politikës Sociale, Demografisë dhe të Rinjve vazhdon të mbështesë zhvillimin dhe zgjerimin e shërbimeve sociale në komunitetet lokale, me qëllim që qytetarët të marrin mbështetje në kohë, cilësore dhe të arritshme në vendbanimin e tyre.
Hapja e Qendrës Ditore në Koçan është një hap i rëndësishëm drejt përmirësimit të cilësisë së jetës për personat me aftësi të kufizuara dhe familjet e tyre, si dhe drejt krijimit të komuniteteve lokale më gjithëpërfshirëse.
