Ministri Vellkovski në takim me përfaqësues të Gjysmëhënës së Kuqe Turke dhe Kryqit të Kuq të Republikës së Maqedonisë së Veriut

Ministri i Politikës Sociale, Demografisë dhe të Rinjve, Gjoko Vellkovski, zhvilloi takim me kryetaren e Gjysmëhënës së Kuqe Turke, prof. dr. Fatma Meriç Yılmaz dhe me përfaqësues të tjerë të organizatës dhe të Kryqit të Kuq të Republikës së Maqedonisë së Veriut, në të cilin u konfirmua gatishmëria e ndërsjellë për thellimin e bashkëpunimit në fushën e mbrojtjes sociale.
Në takim u përshëndet nënshkrimi i Memorandumit të Mirëkuptimit dhe Bashkëpunimit në fushën e shërbimeve sociale ndërmjet Maqedonisë së Veriut dhe Turqisë, të cilin e nënshkruan ministri Velkovski dhe ministrja e Familjes dhe Shërbimeve Sociale e Republikës së Turqisë, Mahinur Özdemir Göktaş.
Krahas kësaj, u theksua se Memorandumi nuk përfaqëson vetëm dokument, por edhe detyrim që përvojat dhe njohuritë e mira të shndërrohen në zgjidhje konkrete, nga të cilat qytetarët do të kenë përfitime.
U shpreh kënaqësia e bashkëpunimit të deritanishëm me Kryqin e Kuq të Republikës së Maqedonisë së Veriut dhe me Gjysmëhënën e Kuqe Turke, si dhe gatishmëri për aktivitete të reja të përbashkëta të orientuara drejt avancimit të shërbimeve sociale.
Në takim vëmendje e posaçme iu kushtua sfidave demografike me të cilat përballen të dyja vendet, siç është plakja e popullsisë, por edhe nevojës për krijimin e kushteve më të mira për të rinjtë.
Bashkëbiseduesit u pajtuan se nuk mund të flitet për demografinë vetëm përmes shifrave. Kështu që, është e nevojshme të krijohen kushte që të rinjtë të qëndrojnë në vendin e tyre, të punojnë, të përparojnë dhe ta ndërtojnë të ardhmen e tyre në vendlindje.
Vellkovski theksoi se pikërisht shkëmbimi i përvojave dhe puna e përbashkët me partnerët ndërkombëtarë mund të kontribuojnë në krijimin e politikave sociale më efikase.
Qëllimi ynë është i qartë – mbrojtje sociale më e fuqishme, shërbime më cilësore dhe më shumë mundësi për të rinjtë. Andaj, partneritetet, ndarja e njohurive dhe e përvojave, si dhe shndërrimi i tyre në rezultate konkrete, janë me rëndësi të madhe” - theksoi Vellkovski.