Sekretari Shtetëror i Ministrisë së Politikës Sociale, Demografisë dhe të Rinjve, Fatmir Sabriu, si pjesë e delegacionit të udhëhequr nga Ministri Limani, merr pjesë në konferencën rajonale tre-ditore në Bukuresht të Rumanisë.
Sabriu, mbajti fjalim në konferencën kushtuar temës “Nga Korniza në Veprim: Ndërtimi i shërbimeve sociale më të fuqishme, më gjithëpërfshirëse dhe të integruara”, ku foli në panelin mbi zhvillimin dhe zbatimin e menaxhimit të integruar të rasteve.
Në fjalimin e tij, theksoi se në Republikën e Maqedonisë së Veriut, menaxhimi i rasteve nuk trajtohet vetëm si një mjet metodologjik, por si një ndryshim themelor sistemik në mënyrën se si shteti i njeh dhe i mbështet qytetarët në rrezik.
“Qëllimi ynë është që sistemi të jetë vërtet i përqendruar te njeriu - drejt nevojave, dinjitetit dhe potencialit të tyre të vërtetë. Menaxhimi i integruar i rasteve na lejon të kemi një qasje holistike, bashkëpunim të fortë ndërinstitucional dhe ndryshime reale e të matshme në jetën e përfituesve", theksoi Sabriu.
Ai nënvizoi se reforma e sistemit të mbrojtjes sociale, e nisur në vitin 2019, bazohet në tre shtylla: një qasje holistike ndaj shërbimeve, koordinim i shtuar midis institucioneve dhe krijimi i një sistemi mbikëqyrjeje dhe mbështetjeje për profesionistët.
Në vitet e fundit, Ministria ka investuar ndjeshëm në trajnimin dhe përforcimin e kapaciteteve njerëzore. Mbi 1.400 punonjës profesionistë nga qendrat e punës sociale, qendrat e punësimit dhe institucione të tjera janë trajnuar në menaxhimin e integruar të rasteve, dhe janë zhvilluar manuale, standarde dhe metodologji në shumë gjuhë.
U theksua veçanërisht parimi “një punëtor profesionist - një familje”, gjë që kontribuon në uljen e viktimizimit sekondar dhe rritjen e efikasitetit dhe cilësisë së shërbimeve.
“Shërbimet sociale të integruara nuk janë të mundura pa menaxhim të integruar të rasteve. Kjo është ura lidhëse midis politikave dhe jetës reale të qytetarëve. Një investim në këtë qasje është një investim në dinjitetin njerëzor, në profesionistë dhe në besimin në institucione”, theksoi Sabriu.
Konferenca në Bukuresht mblodhi së bashku përfaqësues nga institucione, organizata ndërkombëtare dhe ekspertë nga rajoni, me qëllim shkëmbimin e përvojave dhe avancimin e politikave sociale moderne dhe gjithëpërfshirëse.
